Om prosjektet
Bakgrunn
I 2005 er det 100 år sidan oppløysinga av unionen mellom Noreg og Sverige. Korleis opplevde folk i fylket vårt hendingane i året 1905? Fylkesarkivet og kommunane har i fellesskap laga ein informasjonspakke om 1905. Tilsette ved Fylkesarkivet har skrive artiklane og stått for alt anna arbeid med informasjonspakken. Materialet er tilgjengeleg på CD og på nettstadane: http://www.sffarkiv.no/ og http://sognogfjordane.kulturnett.no
Innhald
- Allmenne artiklar om unionsoppløysinga med mange interessante døme frå Sogn og Fjordane.
- Artiklar om året 1905 i kvar av dei 26 kommunane.
- Avskrift av ulike kjelder som gjeld året 1905, særleg valprotokollar og avisartiklar.
- Digitale kopiar av dei originale kjeldene. Her vil du mellom anna finna svært mange kopiar frå alle avisene i fylket i året 1905. Mange handlar om hendingar knytt til oppløysinga av unionen, men mange gir og fengslande tidsbilete frå dette viktige året.
Må lesast i samanheng
Skal du få eit godt bilete av unionsoppløysinga og hendingane i 1905, er det ikkje nok berre å lesa artikkelen om ein kommune. Dei allmenne artiklane er lista opp først. Dei gir viktig informasjon for å forstå det som skjedde.
Bruk av materialet
Me vonar denne informasjonspakken når ut til mange, og at den kan auka kunnskapen om 1905 og om tilhøva i fylket på den tid. Skulane i fylket vil finna mykje nyttig stoff her til utstillingar, som grunnlag for elevarbeid med meir. Me vonar og at det kan gje inspirasjon til mange spanande lokale tiltak i året 2005. Tekst og bilete kan nyttast fritt til ikkje-kommersielle føremål. Gje opp Fylkesarkivet som kjelde, og ta med andre kjeldereferansar som er knytt til materialet. Ein del av illustrasjonane er henta frå Nasjonalbiblioteket sitt 1905-tilbod.
Ha ei hyggjeleg stund med 1905.
(www.sffarkiv.no/1905)
Helsing
Gunnar Urtegaard og resten av staben ved Fylkesarkivet.
April 2005.
